ಚಿತ್ತಾಪುರ : ಜನಪ್ರತಿನಿಧಿಯೊಬ್ಬರು ವಾಟ್ಸ್ ಆ್ಯಪ್ ಗ್ರೂಪ್ ನಲ್ಲಿ ಅಶ್ಲೀಲ ವಿಡಿಯೊ ಹರಿಬಿಟ್ಟು ಪೇಚಿಗೆ ಸಿಲುಕಿದ ಘಟನೆ ಚಿತ್ತಾಪುರದಲ್ಲಿ ನಡೆದಿದೆ.
ಪುರಸಭೆ ಚುನಾಯಿತ ಪ್ರತಿನಿಧಿಯೊಬ್ಬರು ಚಿತ್ತಾಪುರದ ವಿವಿಐಪಿ ವಾಟ್ಸ್ ಆ್ಯಪ್ ಗ್ರೂಪ್ ನಲ್ಲಿ ಎರಡು ಅಶ್ಲೀಲ ವಿಡಿಯೊ ಹರಿಬಿಟ್ಟಿದ್ದು, ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
ವಿವಿಧ ರಾಜಕೀಯ ಪಕ್ಷಗಳ ಗಣ್ಯರು, ಹಿರಿಯರು, ಸರ್ಕಾರಿ ನೌಕರರು, ಪೊಲೀಸರು, ಪತ್ರಕರ್ತರು, ಸಾಮಾಜಿಕ ಕಾರ್ಯಕರ್ತರು, ವಿವಿಧ ಶಿಕ್ಷಣ ಸಂಸ್ಥೆಗಳ ಪದಾಧಿಕಾರಿಗಳು, ಸಂಘಟನೆಗಳ ಸದಸ್ಯರು ಸೇರಿ 205ಕ್ಕೂ ಅಧಿಕ ಜನ ಇರುವ ಗ್ರೂಪ್‌ನಲ್ಲಿ, ಮಹಿಳೆಯರು, ಯುವತಿಯರೂ ಇದ್ದಾರೆ. ಇದೆಲ್ಲ ಗೊತ್ತಿದ್ದರೂ ಜನಪ್ರತಿನಿಧಿ ಗ್ರೂಪ್‌ನಲ್ಲಿ ಅಶ್ಲೀಲ ವಿಡಿಯೊ ಹರಿಬಿಟ್ಟಿದ್ದಕ್ಕೆ ಗ್ರೂಪ್ ಸದಸ್ಯರು ಮುಜುಗರಕ್ಕೆ ಒಳಗಾಗಿದ್ದಾರೆ.
ವಿಡಿಯೊ ಬಂದ ಕೆಲವೇ ನಿಮಿಷಗಳಲ್ಲಿ ಗ್ರೂಪ್‌ನಲ್ಲಿಯೇ ಹಲವರು ತರಾಟೆ ತೆಗೆದುಕೊಂಡರು. ಕೆಟ್ಟ ಅಭಿರುಚಿಯ ವಿಡಿಯೊ ನೋಡಿದ ತಕ್ಷಣ ಗ್ರೂಪ್‌ನಿಂದ ಹೊರಹೋಗಿದ್ದಾರೆ. ಇಷ್ಟಾದ ಬಳಿಕ ಜನಪ್ರತಿನಿಧಿ ತಕ್ಷಣ ವಿಡಿಯೊ ಡಿಲಿಟ್‌ ಮಾಡಲು ಯತ್ನಿಸಿದರು. ಆದರೆ, ಒಂದು ವಿಡಿಯೊ ಮಾತ್ರ ಡಿಲಿಟ್‌ ಆಗಿದ್ದು, ಇನ್ನೊಂದು ಬೇರೆಬೇರೆ ಗುಂಪುಗಳಿಗೆ ಹರಿದಾಡಿತು.
ಅಷ್ಟರೊಳಗೆ ಗ್ರೂಪ್ ಅಡ್ಮಿನ್ ಕೂಡ ಬೇರೊಬ್ಬರನ್ನು ಅಡ್ಮಿನ್ ಮಾಡಿ ಗ್ರೂಪ್‌ನಿಂದ ಹೊರ ಹೋಗಿದ್ದರು. ವಿಡಿಯೊ ಹಾಕಿದ ಜನಪ್ರತಿನಿಧಿಯ ಮಗ ಹೊಸ ಅಡ್ಮಿನ್ ಅವರ ಮನೆಗೆ ಹೋಗಿ ಗ್ರೂಪ್‌ನಲ್ಲಿರುವ ಎಲ್ಲ ಸದಸ್ಯರನ್ನು ರಿಮೂವ್ ಮಾಡಿ, ಗ್ರೂಪ್ ಡಿಲಿಟ್‌ ಮಾಡಿದರು ಎಂದು ಗ್ರೂಪ್ ನಲ್ಲಿದ್ದವರು ತಿಳಿಸಿದ್ದಾರೆ.
