ಭಾರತ ತಂಡ ಹೆಡಿಂಗ್ಲೆ ಟೆಸ್ಟ್ ಪಂದ್ಯದಲ್ಲಿ ಸೋಲಿಗೆ ಮಧ್ಯಮ ಕ್ರಮಾಂಕದ ಬ್ಯಾಟಿಂಗ್ ವೈಫಲ್ಯ ಎದ್ದು ಕಾಣತ್ತಿದೆ. ಭರ್ಜರಿ ತಿರುಗೇಟು ನೀಡುತ್ತಿದ್ದ ಭಾರತ ಕೊನೆಯ 7 ವಿಕೆಟ್ ಗಳನ್ನು 54 ನಿಮಿಷಗಳ ಅಂತರದಲ್ಲಿ ಕಳೆದುಕೊಂಡಿದ್ದು ಭಾರತದ ಬ್ಯಾಟಿಂಗ್ ದೌರ್ಜಲ್ಯಕ್ಕೆ ಹಿಡಿದ ಕನ್ನಡಿಯಾಗಿದೆ.
ಭಾರತ ತಂಡ ಮೊದಲ ಇನಿಂಗ್ಸ್ ನಲ್ಲಿ 78 ರನ್ ಗಳಿಗೆ ಆಲೌಟಾಗಿತ್ತು. ಅದರಲ್ಲೂ 56 ರನ್ ಗೆ 3 ವಿಕೆಟ್ ಕಳೆದುಕೊಂಡಿದ್ದ ಭಾರತ ಕೊನೆಯ 7 ವಿಕೆಟ್ ಅನ್ನು 78 ರನ್ ಆಗುವಷ್ಟರಲ್ಲಿ ಕಳೆದುಕೊಂಡಿತ್ತು. ಅದು ಕೂಡ ಭೋಜನ ವಿರಾಮದ ಸ್ವಲ್ಪ ಸಮಯದಲ್ಲೇ ತಂಡ ಆಲೌಟಾಗಿತ್ತು.
354 ರನ್ ಗಳ ಭಾರೀ ಹಿನ್ನಡೆಯೊಂದಿಗೆ ಎರಡನೇ ಇನಿಂಗ್ಸ್ ಆರಂಭಿಸಿದ್ದ ಭಾರತ ಒಂದು ಹಂತದಲ್ಲಿ 237 ರನ್ ಗೆ 3 ವಿಕೆಟ್ ಕಳೆದುಕೊಂಡು ಇನಿಂಗ್ಸ್ ಸೋಲಿನ ಭೀತಿಯಿಂದ ಪಾರಾಗುವ ಭರವಸೆ ಮೂಡಿಸಿತ್ತು. ಆದರೆ ಶನಿವಾರ ಆಟ ಆರಂಭವಾಗುತ್ತಿದ್ದಂತೆ ಭಾರತ 63 ರನ್ ಗಳ ಅಂತರದಲ್ಲಿ 7 ವಿಕೆಟ್ ಕಳೆದುಕೊಂಡಿದ್ದು, ತಂಡದ ಹೀನಾಯ ಸೋಲಿಗೆ ಪ್ರಮುಖ ಕಾರಣವಾಗಿತ್ತು. ಇದು ಭಾರತ 554 ಟೆಸ್ಟ್ ಪಂದ್ಯಗಳಲ್ಲೇ ಮೊದಲ ಬಾರಿ ಈ ರೀತಿ ಕಳಪೆ ಮೊತ್ತಕ್ಕೆ ಕೊನೆಯ 7 ವಿಕೆಟ್ ಕಳೆದುಕೊಂಡ ಕುಖ್ಯಾತಿಗೆ ಪಾತ್ರವಾಯಿತು.
ರನ್ ಬರ ಎದುರಿಸುತ್ತಿದ್ದ ಚೇತೇಶ್ವರ್ ಪೂಜಾರ ಮತ್ತು ನಾಯಕ ವಿರಾಟ್ ಕೊಹ್ಲಿ ಉತ್ತಮ ಪ್ರದರ್ಶನದ ಹೊರತಾಗಿಯೂ ಈ ವೈಫಲ್ಯ ಅನುಭವಿಸಿರುವುದು ತಂಡದ ಆತಂಕ ಹೆಚ್ಚಿಸಿದೆ. ಪೂಜಾರ ಶನಿವಾರ ಒಂದೂ ರನ್ ಸೇರಿಸದೇ ನಿನ್ನೆಯ 91 ರನ್ ಮೊತ್ತಕ್ಕೆ ಔಟಾದರೆ, ಕೊಹ್ಲಿ ಅರ್ಧಶತಕ ಬಾರಿಸಿ ನಿರ್ಗಮಿಸಿದರು. ಇವರಿಬ್ಬರು ಔಟಾಗುತ್ತಿದ್ದಂತೆ ಉಳಿದ ಬ್ಯಾಟ್ಸ್ ಮನ್ ಗಳು ಪೆವಿಲಿಯನ್ ಪರೇಡ್ ಆರಂಭಿಸಿದರು.
